កីឡាករខ្សែបម្រើឆ្នើម Toni Kroos ទើបតែដាច់ចិត្តនិយាយពាក្យក្នុងចិត្តដែលលាក់ជាយូរមកហើយ ដោយរូបគេបានយល់ព្រមនូវសំណើរទៅលេងអោយក្រុមធំមួយនៅអង់គ្លេស តែចុងក្រោយអ្វីៗបានបរាជ័យ ធ្វើអោយរូបគេត្រូវផ្លាស់ចេញពី Bayern Munich ទៅកាន់ Real Madrid មកទល់សព្វថ្ងៃទៅវិញ។

កាលនោះ ខ្សែបម្រើអាឡឺម៉ង់បានឈានដល់កិច្ចព្រមព្រៀងជាមួយលោក David Moyes ដែលកាលនោះជាអ្នកចាត់ការរបស់បិសាចក្រហម Manchester United ប៉ុន្តែខណះដែលការពិភាក្សាកំពុងតែដំណើរការនៅឡើយ ក្លឹបបែរជាសម្រេចដេញលោក Moyes ចេញហើយជំនួសមកវិញដោយលោក Louis van Gaal ហើយគ្រូបង្វឹកថ្មីបែរជាមិនយល់ស្របចំពោះការនាំ Kroos មកកាន់ Old Trafford ជាហេតុធ្វើអោយរូបគេផ្លាស់ចិត្ត ហើយធ្វើដំណើរទៅកាន់ប្រទេសអេស្ប៉ាញដើម្បីចូលរួមជាមួយ Real Madrid វិញ។

អាចថាជារឿងដ៏ល្អមួយសម្រាប់អាជីពបាល់ទាត់របស់​ Kroos ក៏ថាបាន ខ្សែបម្រើជើងចាស់រូបនេះបានក្លាយជាកីឡាករមួយរូបដែលអធិរាជសមិនអាចខ្វះបាន ដោយបានជួយអោយ Real Madrid លើកពានធំៗជាច្រើនដូចជា Champions League នឹង Club World Cup 5 ដង។ លើសពីនេះ Kroos ក៏មានឈ្មោះជាកីឡាករដែលបានលើកពាន UEFA Super Cup , Spanish Super Cup នឹង La Liga ចំនួនបួនលើកផ្សេងៗគ្នាជាមួយ Real Madrid ផងដែរ ហើយពាន Copa del Rey ម្តងកាលពីឆ្នាំ 2023 ហើយបានសាងទំនាក់ទំនងដ៏ពិសេសនៅតំបន់បម្រើជាមួយ Luka Modric នឹង Casemiro ថែមទៀតផង៕